熊仔仔篤篤吓 The Bear with a Walking Stick

Oct 4, 2024 View post 市中心搭巴士返屋企，坐低冇耐一位中年女士扶住一位婆婆上車，仲推住架摺疊輪椅。 「咁樣放會唔會阻到人哋落車㗎？」佢哋將輪椅剛好放咗喺我面前。 「一陣間我推開少少俾人哋落車啦。」 我除低AirPods，『唔緊要，推開少少好易姐。』 「啊……唔好意思，唔該晒你吓。」中年女士安頓婆婆坐好，就坐咗上樓上，樓下冇位了。 ------ 「咦你講廣東話噃。」婆婆問我。 『係呀我香港人嚟！婆婆你哋住邊呀？』 「我住雷丁㗎。」 『呢度咪雷丁囉！』轉念一想，係噃，婆婆可能唔識英文，淨係知道「雷丁」，『成個雷丁好大㗎，我哋呢度都係雷丁。』 「哦，係呀，我哋返去都要搭半個鐘頭有多，搭呢架啦，1號、26號都返到去。」 咁我知邊度嘞，『係咪有間好大超級市場嗰度呀？』 「係呀係呀，嗰度仲有間麥當勞㗎！」婆婆好可愛。 『嗰邊都幾好住吖！』 「幾好咁啦，不過都係要靠班後生，我又唔識英文，冇佢哋真係出去買嘢都唔得掂。」 果然婆婆唔識英文。唔知佢住得慣唔慣？ 「你搬咗嚟幾耐呀？我住咗兩年啦，呢邊冇夏天㗎，好舒服。」 本地人年年都話 heat wave，對我哋嚟講濕濕碎姐。 「我今年開咗兩日風扇咋！喺香港，晚晚開冷氣都唔掂！」 「你香港住邊㗎？」 我住沙田。其實我都唔知應該講邊度好。「哦，沙田，沙田好住呀。我喺港島。」 夏天你唔怕姐，冬天會唔會凍？「唔知呀，我冇喺呢度過過冬天，冬天會返香港避暑。」 『……冬天返香港避寒，夏天喺呢度避暑！』「哈哈係呀係呀！」 巴士轉入我住嗰條街。 「嘩呢度好多人上落噃。」 『係呀，呢條街好似港島電車路咁，好多人㗎。』100年